08:37 День Орнитолога | |
 
Олунньу 19 күнүгэр 2021 с. Мария Егоровна Охлопкова аатынан Түбэ орто оскуолатыгар Бүтүн Сойуустааҕы орнитолог күнүн бэлиэтээтилэр. Ол курдук орнитолог идэлээх биология билимин кандидата Борис Игнатьевич Сидоров 75 сааһыгар аналлаах кылаас чаастара ыытылыннылар, маны таһынан оҕолор “Знаете ли вы птиц Якутии” викторинаҕа көхтөөх кыттыыны ыллылар. Викторинаны Б.И.Сидоров “Знаете ли вы птиц Якутии” кинигэтинэн ыйытыктарын ХИФУ профессора, экология кафедратын преподавателя Прасковья Алексеевна Гоголева таҥан оҥордо. Бастыҥ билиилээҕинэн 3 кылаас үөрэнээччитэ Дьяконова Катя, 2с миэстэҕэ Сивцев Тимур (2 кылаас), 3с миэстэҕэ Григорьев Эрсан (4 кылаас), Пестряков Тимур (2 кылаас) таҕыстылар.Үөрэнээччилэр бириэмийэлэринэн, махтал суруктарынан, сертификаттарынан наҕараадаланнылар. Алын кылаас үөрэнээччилэрэ бэйэлэрин илиилэринэн оҥорбут скворечниктарын чыычаахтарга анаан саҥардан эбии ыйаатылар, аһылыктарын бэлэмнээтилэр. М.Е.Охлопкова аатынан Түбэ орто оскуолата экологическай хайысханнан үлэлээбитэ балайда буолла. Үөрэхтээһиҥҥэ, иитиигэ экологическай хайысханы тутуһан үлэ тосхоло киэҥ далааһыннаахтык барар. Сааскы ыһыы үлэлэрэ саҕаланан, араас сибэкки, оҕуруот астарын рассадата, дьэдьэн араас суорда күөҕүнэн чэлгийэн тураллар. Манна хас биирдии оҕо үүнээйи олордуутугар илиитин сылааһын биэрэн үлэлэстэ. Бу үүнээйилэрин сайын устата бүөбэйдээн көрүөхтэрэ-истиэхтэрэ. Маннык үлэлэр оскуолаҕа сылы эргиччи ыытыллар буоланнар оҕолор билиилэрэ-көрүүлэрэ чиҥээн, кэҥээн, дириҥээн иһиэҕэ. Уһун кыһыннаах, тыйыс тымныылаах Сахабыт сиригэр кыстыыр көтөр кынаттаахтарбытын харыстыаххайын! Айылҕабыт чөл туруктаах буоларыгар кыралыын-улаханныын биир ситим буолан үлэлэһиэххэйин! | |
|
| |
| Всего комментариев: 0 | |
