08:33 Ийэ тыл, сурук-бичик күнэ | |
 Олунньу 13 күнэ – Саха Өрөспүүбүлүкэтигэр Ийэ тыл, сурук-бичик күнэ. Бу күн биһиги оскуолабытыгар үөрүүлээх линейка ыытылынна, Лидия Николаевна Егорова салайааччылаах үөрэнээччилэр “Уолан” бөлөхтөрө литературнай композицияларын көрдөрдүлэр. Библиотекарь Марита Афанасьевна Сивцева өрүү буоларын курдук баай ис хоһоонноох “Мин ийэ тылым – саха тыла” кинигэ быыстапкатын тэрийдэ. Гуманитарнай предметтэр учууталларын методическай холбоһугун көҕүлээһининэн, оҕолорго сахалыы уус-уран тылы иҥэрэр, ылбаҕайдык саҥарар дьоҕуру сайыннарар, төрөөбүт литературабытын билиини дириҥэтэр, көрөөччү иннигэр тахсар үөрүйэҕи үрдэтэр сыаллаах, саха суруйааччыларын айымньыларынан театральнай көрүү күрэҕэ ыытылынна. Үс киһилээх жюри (ветеран учуутал, оһуохайы үтүөлээх этээччи Егоров Аскалон Лукич, кулууп уус-уран салайааччыта Григорьева Людмила Савельевна, “Уус-уран ааҕыы” дьарык салайааччыта Егорова Лидия Николаевна) үлэлээн түмүгү үс бөлөҕүнэн таһаарда. 1 бөлөххө 4 кылаас (салайааччы Куприянова Ольга Семеновна), Амма Аччыгыйа "Тоҕус төгүл тоҕо?", 2 бөлөххө 8 кылаас (салайааччы Дьяконова Дария Романовна) Суорун Омоллоон "Бэйэтэ эмтиэкэ", 3 бөлөххө 9 кылаас (к.с. солбуйааччы Егорова Лидия Николаевна) Эрилик Эристиин "Хачыгыр" айымньыларын бастыҥнык көрдөрөн Кылаан кыайыылаах үрдүк аатын ылыахтарын ыллылар. Дьоруой характерын туйгуннук биэрэн “Оруолу бастыҥ толорооччуларынан” кыргыттарга Дьяконова Катя (3 кыл.), Лукина Анжелика (6 кыл.), Попова Надя (9 кыл); уолаттарга Куприянов Алгыстаан (4 кыл.), Попов Влас (8 кыл.), Попов Айдын (9 кыл.) ааттаннылар, грамоталарынан, туоһу суруктарынан бэлиэтэннилэр. Итини таһынан үөрэнээччилэрбит Тыл күнүн чэрчитинэн кэтэхтэн ыытыллар “Уоланнар ааҕыылара”, “Тыыннаах тыл”, “Хобо чуораан”, “Даадар ааҕыылара”, “Ийэ тыл илгэтинэн”, “Уран тыл” улуустааҕы, республиканскай тэрээһиннэргэ кытыннылар. | |
|
| |
| Всего комментариев: 0 | |
